لاہور (مانیٹرنگ رپورٹ)کرپشن مکاون دی گلاں اساں بہوں کردے ہاں پر جیہڑی کرپشن ساڈے نک دے تھلے ہورہی ہوندی ہے اوس توں منہ پراں کر لیندے ہاں۔سمندر پار کرپشن دے سوتے لبھن والے اپنے آل دوال نہیں ویکھنا چاہندے کیونجے انہاں نوں ”رب نیڑے یا کسھن نیڑے“ دا اکھان چیتے رہندا ہے۔جوگیاں، صوفیاں تے بھگتاں ہمیش لوک بھلے تے لوک سیوا دے کم کیتے اتے دربار تے مزار سیوا تے ملن ورتن دے لشکارے سن۔پہلے انگریزاں دے دور وچ اتے بعدوں کالے انگریزاں ایس بندوبست وچ وگاڑ پیدا کیتا کہ اج مسلم تے غیر مسلم اوقاف تے متروکہ املاک دے محکمیاں بارے مڑ جھات پاون دی لوڑ ہے۔خبراں پاروں دسیا گیا ہے کہ محکمہ اوقاف وچ آون والے نویں سیکرٹری نے ادارے نوں سدھارن دی ٹھان لتی۔ تمام افسراں نوں اپنا قبلہ درست کرن دی ہدایت ،کرپٹ مافیا پریشان۔ قرآن بورڈ کمپلیکس عمارت دا تھرڈ پارٹی توں آڈٹ کرن دی سمری ارسال۔ کئی سالاں توں کڑوڑاں روپے دی وقف پراپرٹی واگزار کرا کے کرپٹہ دار دے حوالے کردتی گئی۔ اوچ شریف وچ دربار تے قبضہ مافیا دے خلاف ایکشن، غنڈہ گردی کرن تے سیکرٹری دے حکم تے سجادہ نشین نشین سمیت 15 افراد خلاف مقدمہ درج۔ نااہلی وکھان تے ایس ایچ او لائن حاضر۔ لہور زون دی بہتر کارگردگی لئی عظیم حیات نوں دوبارہ زونل ایڈمنسٹریٹر تعنیات کردتا گیا۔ادارے دی انکم ودھان لئی تمام زونل ایڈمنسٹر یٹر نوں سخت ہدایاں جاری کردتی گئیاں نیں۔ تفصیلاں ایہہ نیں کہ محکمہ اوقاف وچ تعنیات ہون والے سیکرٹری عبدالجبار شاہین نے ادارے دی کارگردگی نوں بہتر کرن لئی کوششاں تیز کردتیاں۔ انہاں نے اک میٹنگ وچ ادارے دے تمام ڈائریکٹرز نوں سختی نال آکھیا کہ اپنے شعبہ دی کارگردگی نوں بہتر بنان۔ ذرائع دے مطابق ادارے دی مالی حالت انتہائی خراب ہے پر موجودہ سیکرٹری عبدالجبار شاہین توں کافی ا±میداں کیتیا جا رہیاں نیں۔ کجھ دن پہلے سیکرٹری نے قرآن بورڈ کمپلیکس دا وزٹ کیتا تے عمارت دا جائزہ لین ایس عمارت دے آبعدوں تھرڈ پارٹی توں آڈٹ کران دی سمری تیار کرالتی گئی ہے۔ لہور وچ ملتان روڈ تے واقع موضع چونگھ وچ ادارے دی کڑوڑاں روپے دی پراپرٹی 2005 وچ پٹرول پم لئی نیلام کردتی گئی سی۔ پٹہ دار نے ادارے نوں 36 لکھ روپے گڈویل دے طور تے ادا کردتے سن۔ پر ایس تے قبضہ مافیا دا قبضہ سی۔ ہن ادارے دے افسراں تے ملازماں نے ایہہ تھاں وگزرا کرا کے پٹہ دار دے حوالے کردتی ہے۔ ایس طراں بہالپور زون دے علاقہ اوچ شریف وچ قائم دربار حضرت جلا الدین تے مقامی گدی نشین قابض سن۔ اپنی مرضی دے نگران تعینات کروائے ہوئے سن جو انہاں دے خاص سن۔درباراں، مزاراں تے سب توں وڈے گھپلے چندے دے غلے یا بکسے نوں کھولن تے دربار نال جڑی زمیناں دے قبضیاں نال جڑے نیں۔ایہہ بہوں وڈا مسئلہ کہ ایس نوں حل کروا کے مزاراں، درباراں دی تکریماں نوں ودھانا ویلے دی لوڑ۔ بہالپور دے زونل ایڈمنسٹریٹر ایاز لاشاری نے سیکرٹری عبدالجبار شاہین نوں اوچ شریف بارے رپورٹ دتی ہے۔خبر وچ دسیا گیا ہے کہ سیکرٹری نے متعلقہ آر پی او نوں فون کیتا کہ ادارے دے افسراں نے دربار جلال الدین دی کیش اوپنگ کرنی ہے پر اوتھے کجھ شرپسند عناصر غنڈہ گردی دی دھمکی دے رہے نیں۔ متعلقہ پلس ٹیشن نے اپنی گڈی تے نفری گھل دتی پر متعلقہ ایس ایچ او ایس نوں غیر اہم سمجھدے ہوئے آپ موقع تے نہ گیا جس دی وجہ توں دربار تے اوقاف عملے دے نال غنڈہ گردیاں کیتیاں گئیاں تے سرکاری گڈی نوں نقصان پہنچایا گیا۔ایس دی اطلاع سیکرٹری اوقاف نوں دتی گئی جس تے مڑ ایکشن لیندے ہوئے متعلقہ ایس ایچ او نوں نااہلی تے لائن حاضر کردتا تے زمرد حسین سمیت 15 افراد دے خلاف مقدمہ کرلتا گیا۔ زونل ایڈمنسٹریٹر بہالپور ایاز لاشاری نے آکھیا کہ ایہہ تریخ وچ پہلا موقعہ ہے کسی سیکرٹری نے ایہو جیہے مافیا دے ا±تے ہتھ پایا ہے۔ دوجے زونز دے کرپٹ مافیا لئی پیغام ہے۔ لہور زون دی کارگردگی بہتر نہیں سی تاں مارے سیکرٹری نے شعبہ اسٹیٹ دے ڈپٹی ڈائریکٹر عظیم حیات نوں زونل ایڈمنسٹریٹرلہور زون لا دتا ہے۔ایہہ نیوز”خبراں اخبار“ دی ہے پر ایہہ مسئلہ ایڈا نکا نہیں۔ایوبی دور وچ بنائے محکمہ اوقاف نوں اک نویں پالیسی دی لوڑ ہے۔