لاہور(مانیٹرنگ رپورٹ)توہین مذہب دے مقدمے دے تفصیلی فیصلے وچ اسلام آباد ہائی کورٹ دے پردھان جج شوکت صدیقی ہوراں لکھیا ہے پئی جے کوئی توہین مذہب دا غلط الزام لائے اوس نوں اوہی سزا دتی جائے جیہڑی توہین مذہب والے لئی دسی گئی ہے۔پارلیمنٹ ایس حوالے نال قنون سازی کرے۔ایہہ فیصلہ اگست دے دوجے ہفتہ نوں آیا سی پر ایس تے اگے کیہہ ہو رہیا ہے ایس بارے ہن ذمہ واری پارلیمنٹ تے ہے۔فیصلے وچ ایہہ گل من لتی گئی کہ ایس قنون دا غلط ورتارا ہوندا ہے اتے مخالفاں تے جھوٹے کیس بنوا دتے جاندے نیں۔ ویسے تے زنانیاں دے حقاں لئی بنائے قنون وچ وی ایہو گھاٹے ویکھے گئے نیں۔ تعلیمی اداریاں سمیت مختلف محکمیاں وچ مخالفاں نوں نکرے لاون لئی ایس قنون نوں ورتیا جا رہیا ہے۔سوال ایہہ ہے پئی قنون نوں غلط ورتن والیاں اتے غلط فیصلے دین والیاں نوں کس طراں قابو کیتا جائے؟پارلیمنٹ ایس بارے سوچے۔