مردان (مانیٹرنگ رپورٹ)ہلے تیک صوبائی سرکار ولوں کوئی بندہ مشال دی تعزیتاں لئی اوس دے پنڈ کیوں نہیں گیاا؟ اخیر پی ٹی آئی، عمران خان، سراج الحق تے خٹکی سرکار مشال خان دے مسئلہ توں جان چھڈان دی کوششاں کیوں کر رہے نیں؟ جنج اولف کیرے ورگے انگریزاں نے جعلی تفاخراں تے تعصباں والی تریخ لکھ کے پٹھاناں تے پختوناں نوں کراہے پایا سی اینج ہی کجھ براون صاحباں پشتو گانے چلا کے پختوناں نوں بے وقوف بنادے رہے۔ پرصوفی مشال ہوراں اپنی جان دان کر کے بہوں سارے پختونی حقاں دے دعویداراں نوں ایکسپوز کر چھڈیا۔ہن جے او

س دے پیو نے فوجی عدالتاں وچ کیس لیجاون دا آکھیا ہے تے اوس دی وجہ وی صوبائی سرکار دا رویہ ہے۔انہاں نوں صوابی دا رستہ کیوں بھل گیا ہے؟صوبے وچ سب فرقیاں نوں نال لے کے وڈا جلسہ کرن والے مولانافصل الرحمن وی چپ کہ کتھے ہر کوئی اپنے اپنے حلقیاں نوں بچا رہیا ہے؟ جداں خیبر پی کے دی سرکار نوں اپنا کونسلر وی نہ لبھیا جس تے لوکاں نوں مشتعل کرن دا الزام ہے تاں مشال دے والد فوجی عدالتاں دا مطالبا ہی کرنا سی۔ذرا غور کرو، مرن والا وی پختون، مارن والے وی پختون، مشال دے قتل تے کھیڈن والے وی پختون، صوبائی خٹکی سرکار وی پختون، پختون اسلامی جماعتاں چپ، اوہ وی مشال دے پیو نال فوٹو سیشن کر رہے نیں جنہاں پختون سٹوڈنیٹ فیڈریشن دے اجمل معیار دے خلاف اک بیان نہیں دتا جس یونیورسٹی ملازماں نوں اکسایا؟کہ ایس پختون سیاست دی آڑاں وچ کیسے کیسے تعفن نوں پناہواں دتیاں جاندیاں نیں ایہہ سب اک مشال سامنے لے آیا۔