روشن امریکہ:ٹرمپ دی گھٹیا امیگریشن پالیسی تے عدالتی فیصلے خلاف وکھالے، ساڈا میڈیا چپ؟

لاہور(مانیٹرنگ رپورٹ)اساں سرحداں تے دیواراں دے خلاف ہاں۔ساڈا نیویارک بے وطنیاں ہی وسایا ہے۔بے وطنا تے پناہ گیر ہونا جرم نہیں۔بے وطنیاں نوں پھڑیچن والے آئی سی ای کیمپاں نوں مکایا جائے۔پناہ گیراں تے مسلماناں نوں امریکہ وچ جی آیا نوں۔ایہہ پالیسیاں نری نسل پرستیاں نیں۔بچیاں نوں ماواں توں وکھرا کرن والے انسان نہیں ہو سکدے۔شرم نال ڈب مرو۔ 
ایہہ نیں اوہ نعرے تے بیان جیہڑے اج کل امریکہ دے وائٹ ہاوس دے اگے ہی نہیں سگوں نیویارک سنے امریکی ریاستاں وچ سنے جا رہے نیں۔میڈیا گروپ فرانس24 دی خبر دا لنک اخیر وچ دے رہے ہاں جس وچ ہزاراں لوکاں دے وکھالیاں دے ویڈیو کلپ وی نیں۔وائٹ ہاوس اگے وکھالا کرن والی سیبسٹین میڈینا ہوراں انگریزی تے ہسپانوی زباناں وچ پمفلٹ ونڈیا تے آکھیا اساں نہ تے وطنی باڈراں تے یقین رکھدے ہاں اتے نہ ہی دیواراں بناون دے قائل ہاں۔لاوڈسپیکر تے اک برازیلی زنانی دی آواز گونجی جس دی نکے بچے نوں اوس توں وکھ کر دتا گیا سی۔90فارن ہائیڈ دے ٹمپریچر وچ لوک وڈی گنتری نال وکھالے وچ رلتی سن تے شرم کرو، شرم کرو دے نعرے لا رہے سن۔ 
کجھ دن پہلاں امریکی سپریم کورٹ نے ٹرمپ دے حق وچ جیہڑا فیصلہ دتا سی ایہہ وکھالے اوس دے خلاف نیں۔ ٹرمپ نے امیگریشن قنون وچ ماپیاں توں بچیاں نوں وکھرا کرن بارے نرمی وکھائی ہے پر وکیلاں ایس نوں ڈرامہ دسیا ہے کیونجے ایس وچ اوکڑاں پا دتیاں نیں۔پراسس ایڈا کوڑ ہے کہ اج وی دو ہزار بچے ماپیاں توں وکھرے نیں۔وکھالے وچ 36سالہ ریٹا وی رلتی سی جیہڑی واشنگٹن وچ وکیل جے۔ اوہ اپنے دو تے چار سال دے منڈیاں نال آئی سی۔کیلی فورنیا جمن والی ریٹا میکسکو دا پچھوکڑ رکھدی ہے۔نیویارک دے وکھالے وچ58سالہ جولیا لیم رلت کیتی جیہڑی1980دے دہاکے وچ ہانگ کانگ توں امریکہ آئی سی۔وکیل کورٹنی میلو ہوراں آکھیا پئی سانوں سب نوں بے وطنیاں تے پناہ گیراں دی مدد کرنی چاہیدی ہے۔ 
اینج جاپدا ہے پئی ٹرمپ خلاف ہون والے وکھالیاں نوں میڈیا تے رپورٹ کرن توں ڈکیا جا رہیا ہے۔بی بی سی تے وائس آف امریکہ دی چپ تے سمجھ آوندی ہے پر پاکستانی میڈیا کیوں چپ ہے؟