الیکشن نہیں قومی حکومت۔حافظ سعید تے لشکر تے پابندی غلط سی۔ پرویز مشرف

لاہور(مانیٹرنگ رپورٹ)مشرف تے عمران کان دے حمائیتیاں لئی اک ہور جھٹکا۔جیہڑے مشرف دے لبرل ازم تے مرے جاندے سن اوہ ایہہ بیان پڑھ لین۔ آندے نیں گدڑ دی موت آئے تے اوہ شہر ول دوڑدا ہے۔ ہن تے مشرف تے نہ ہی ایم کیو ایم بھروسہ کردی ہے اتے نہ ہی جہادی۔جنہاں ایس نوں باہر گھلیا سی اوہ وی سوچدے ہون گے ایس نوں دوڑایا کیوں۔ڈکٹیٹر، مل مارو صدر تے آرمی چیف رہن والا آندا ہے پئی میں دبا وچ آ کے لشکر طیبہ تے حافظ ہوراں تے پابندیاں لائیاں سن۔ پہلے ایہہ تے دس دے پئی ایس خدمت تے جیہڑی رقماں کمایاں سن اوہ کتھے نیں۔ایہہ ہے اوہ ات گردیاں خلاف کوڑ جنگ اتے اوس دا پردھان کردار۔اج اوہ ملی مسلم لیگ نال ملن لئی تیار ہے۔ ایہہ عمران خان آکھدا سی پئی پی پی پی اتے ن.لیگ توں ایس مشرف دی سرکار چنگی سی۔ پر مشرف کھوتا ہی کھو وچ سٹ ماریا ہے۔مشرف دے چمچیاں نوں کجھ مشرف مخالف صحافیاں میڈیا وچ مڑ کھڑا کیتا ہے۔ایہہ سب اک مائنڈ سیٹ دا بوتھا ہے۔این جی اوز تے ڈونر وی غور کرن پئی اوہ ایس بندے نوں چکدے رہے نیں۔رقماں کماون لئی لبرل ازم دا چولا کوئی وی پا سکدا ہے۔جمہوریت توں بغیر لبرل ازم اک فراڈ۔عمران خان نوں وی ہن سمجھ جانا چاہیدا ہے ہورے۔پی پی پی والے جے ہن وی نہ سمجھے تے انہاں دا حال وی مشرف ورگا ہو سی۔ہن تے کوڑ ایجنڈا بدبو چھڈ رہیا ہے اتے ایس دا ٹریلر فیض آباد سب ویکھیا۔ جو مشرف ہن آکھیا ہے اوہ آپ پڑھ لو۔
دبئی: ڈکٹیٹر جنرل (ر) پرویز مشرف نے آکھیا ہے کہ پاکستان نوں جمہوریت یا الیکشن دی تھاں قومی حکومت دی لوڑ ہے۔ جمہوریت تے آئین نوں ریاست لئی قربان کیتا جاسکدا ہے۔ 2018 وچ الیکشن ہوندے نیں نظر آرہے ۔آئندہ الیکشن وچ حافظ سعید تے ملی مسلم لیگ دے نال انتخابی اتحاد ہوسکدا ہے۔ ایتوار نوں نجی ٹی وی نوں دتے دگئے انٹرویو وچ آمر جنرل (ر) پرویز مشرف نے آکھیا کہ الیکشن پاکستان دی لوڑ نہیں صرف سلیکشن دی لوڑ ہے ۔ڈکٹیٹر نے ایس خاہش دا اظہار کیتا کہ پاکستان وچ آئندہ الیکشن نہیں ہونے چاہیدے۔ انہاں نے آکھیا کہ جے لشکرطیبہ وی الیکشن وچ آنا چاہندی ہے تے چنگی گل ہے(ایہہ اوہی جماعت ہے جس نوں مشرف بین کیتا سی)۔ جے مسلم لیگ (ن) تے پیپلز پارٹی نوں ہی فیر توں اقتدار وچ آنا ہے تے فیر ایہہ پاکستان تے ظلم ہی ہوئے گا۔ جنرل (ر) پرویز مشرف نے آکھیا کہ آل پاکستان مسلم لیگ دا آئندہ الیکشن وچ حافظ سعید تے ملی مسلم لیگ دے نال انتخابی اتحاد ہوسکدا ہے۔ خود نوں سب توں وڈا جمہوریت پسند کہندے ہوئے ڈکٹیٹر آکھیا کہ مینوں حافظ سعید تے لشکر طیبہ تے پابندی نہیں لانی چاہیدی سی۔ سانوں پاگل کتے نے وڈھیا ہے کہ اسی آکھیے کے لشکرطیبہ دہشتگرد ہے، لشکر طیبہ نے کشمیر وچ سب توں زیادہ قربانیاں دتیاں نیں۔ مشرف نے آکھیا کہ پاکستان نوں سلیکٹڈ قومی حکومت دی لوڑ ہے۔ڈکٹیٹر نے اپنے دور حکومت وچ حافظ سعید تے پابندی نوں عالمی دباؤ دا نتیجہ قرار دیندے ہوئے آکھیا کہ عالمی دباؤ پاروں اپنے دور حکومت وچ حافظ سعید تے لشکر طیبہ تے پابندی لانی پئی سی۔ہن وی سانوں حافظ سعید دے بارے وچ امریکی مطالبیاں نوں رد کر دیناچاہیدا ہے۔