لاہور (ماینٹرنگ رپورٹ)اک زمانہ سی جداں گردیاں دے بیوپاری سر عام دندنادے سن۔اج اوہ سب کاروبار یا زیر زمین چلا گیا یا مک گیا کہ قنون بہوں سخت ہے۔ پر ایس پاروں کوئی تیز تے زمینی حقیقتاں نال جڑیا بندوبست وی بنانا لوڑی دا ہے جتھے اصلی مریضاں دا علاج ہوئے۔کڈے ہی مریضاں دے سگے رشتے دار ایس قابل نہیں کہ اوہ گردے دے سکن تے کیہہ اوہ مریض نرے ایس پاروں مرن لئی تیار رہن۔قنون بنان والیاں ایس تے جے غور نہیں کیتا تے اج کر لین۔سرکار انسانی اعضاواں دے دان کرن دا کوئی چنگا بندوبست بناون بعدوں سخت قنون بنادی۔ ہ

ن وی اصلی مریضاں دی چھان پھٹک دا تیز بندوبست بنانا ایڈا انہونا کم نہیں۔ایہہ نہ ہوئے کہ لوک آکھن کہ جداں قنون نہیں سی اوس ویلے گھٹ وگھٹ علاج تے ہو جاندا سی۔کاروبار کرن والیاں نوں ضرور پھڑو، پر اصلی مریضاں لئی وی سہولتاں ہونیاں لوڑی دیاں نیں۔پچھلے دناں جنرل ہسپتال دے ڈاکٹر پھڑیچے گئے سن۔انہاں وچ اک تے ڈاکٹراں دی تنظیم دا لیڈر وی سی۔ایس کیس نوں پھڑنا اک وڈی گل ہے،ہن ایف آئی اے نے گردیاں دی غیر قنونی پیوندکاری کیس وچ کاروائی کردے ہوئے مری توں 3 سہولت کاراں نوں گرفتار کرلتا ہے۔ ملزم باہر دے ملکاں توں مریضاں نوں پاکستان لے کے آندے سن۔رقماں چوکھیاں جو ملدیاں سن۔ ایف آئی اے ذرائع دے مطابق تنوں ملزماں بیرون ملک وچ گردیاں دے عارضے وچ مبتلا مریضاں نوں پاکستان وچ علاج کران دی پٹیاں پڑھاندے تے ایس توں بھاری رقماں وصول کرکے پاکستان وچ موجود گروہ دے حوالے کردیندے۔ دسیا گیا ہے کہ پیوندکاری کرن والے ڈاکٹراں دی گرفتاری دے بعد تِناں ملزماں ثاقب خان، فیضائل تے قمرچترال تے وادی کیلاش وچ روپوش ہوگئے سن۔ ملزم کجھ دن پہلاں چترال توں فیصل آباد آئے تے اپنی دوست دے نال پہاڑاں ول ٹرگئے۔ ایف آئی اے ٹیم نے ملزماں دا تعاقب کرکے انہاں نوں مری توں گرفتار کرلتا۔ ایف آئی اے ٹیم اک خاتون سہولت کار نوں وی گرفتار کر چکی ہے۔جداں تیک اصلی مریضاں نوں علاج دا مناسب بندوبست نہیں ملے گا اوس ویلے تیک اجہے گروہ بن دے رہن گے۔سرکار گردے ویچن دے کاروبار نوں روکنا چاہندی ہے جیہڑا اک چنگا کم ہے پر ایس نال اج کل اصلی مریض وی بھیڑے حالات وچ نیں۔جداں کوئی چنگاقنون عام بندے ہی نوں تنگ کردا ہے تے اوس دا ٹیچا ہی کوڑ ہو جاندا ہے۔ایس سب بارے مڑ جھات پاون دی لوڑ ہے۔