اسلام آبا(مانیٹرنگ رپورٹ) پاکستان دی عدالت عظمیٰ ولوں سابق وزیراعظم نواز شریف نوں آئین دی شق 62 دے تحت نا اہل قرار دین دے بعد آئین دی شقاں 62 تے 63 تے سیاسی و سماجی حلقیاں وچ خوب بحث جاری ہے۔ حکومت آکھیا ہے کہ اوہ انہاں شقاں وچ ترمیم لیان دا ارادہ رکھدی ہے جیہناں دے پاروں اسمبلی ممبراں لئی ضروری ہے کہ اوہ ’’صادق تے امین‘‘ ہون۔ چیتے رہے پئی اپوزیشن دی مختلف جماعتاں آئین دی انہاں شقاں وچ ترمیماں نوں کسے سیاسی فیدے توں وکھ ہو کے حل کرنا چاہیدیاں نیں۔ اسی بحث دے دور

ان ’جمہوری وطن پارٹی‘ نامی اک جماعت دے سربراہ بیرسٹر ظفر اللہ نے عدالت عظمیٰ دی لاہور رجسٹری وچ درخاست دائر دی ہے جس وچ فوج دے جرنیلاں تے اعلیٰ عدلیہ دے جج صاحبان دے حلف نامیاں وچ وی ’’صادق و امین‘‘ دے الفاظ دا اضافہ کرن دی استدعا کیتی گئی ہے۔ درخاست وچ آکھیا گیا ہے کہ عدالت عظمیٰ تے عدالتِ عالیہ دے ججاں تے مسلح فوجاں دے جرنیلاں دے حلف نامیاں وچ صادق تے امین دا لفظ موجود نہیں جو آئین دی شق 63,62 دی خلاف ورزی ہے۔ درخاست وچ موقف اختیار کیتا گیا ہے کہ پارلیمان اک مقتدار ادارہ ہے تے قنون دے تحت جج تے جرنیل اپنی آمدن تے اخراجات دے اعداد و شمار پارلیمنٹ دی احتساب کمیٹی دے سامنے پیش کرن دے پابند ہے۔ تاحال ایس درخاست دے قابل سماعت ہون یا نہ ہون دے بارے وچ کوئی خبر سامنے نہیں آئی ہے۔