لاہور(مانیٹرنگ رپورٹ)اج پنجاب انفارمیشن کمیشن لہور ہائی کورٹ دے رجسٹرارنوں چیف جسٹس دی تنخواہ تے مراعات دسن دے حوالے نال آئی درخاست تے عمل دآکھیا ہے۔ کمیشن ایہہ وی آکھیا ہے پئی ہائی کورٹ اک انفارمیشن آفیسر مقرر کرے جیہڑا قنون پاروں لوڑی دا ہے۔قنون تے کدوں دا پاس ہو چکیا ہے پر ہائی کورٹ نون ہی قنون دا نہیں پتہ؟ لہور دے سرمد علی کمیشن نوں دسیا سی اساں رجسٹرار کولوں ایہہ گلاں درخاست دے کے پچھیاں سن پر انہاں سانوں نہیں دتیا حلانکہ پنجاب ٹرانسپرینسی اینڈ رائٹ ٹو انفارمیشن ایکٹ 2013 پاروں انہاں نوں

ایہہ معلومات دے دینیاں چاہیدیاں سن۔ نومبر وچ کمیشن رجسٹرارنوں ایس بارے فیصلہ کرن دا آکھیا سی۔ کمیشن رجسٹرار نوں دسیا سی پئی قنون پاروں انفارمیشن آفیسر مقرر کرنا ضروری ہے۔ ایس موقع تے ڈپٹی رجسٹرار ایہہ آکھ دتا پئی سانوں تے سرمد دی درخاست ملی ہی نہیں۔ کمیشن رجسٹرار آفس نوں لکھیا پئی لہور ہائی کورٹ اک پبلک باڈی ہے اتے ایس نوں معلومات تک رسائی دے قنون پاروں بہوں ساری شقاں تے آپ ہی عمل کرلینا چاہیدا سی۔ کمیشن آکھیا ہے پئی جیہڑی معلومات چاہیدیاں نیں اوہ سانوں 4 اپریل تیک دے دیواتے قنون دے مطابق جیہڑے کم ہائی کورٹ آفس نوں کرنے نیں اوہ وی کیتے جاون۔ ایس ماملے نوں لہور ہائی کورٹ دے چیف جسٹس نوں آپ ویکھنا چاہیدا ہے کیونجے بیوروکریسی ہر جگہ انفارمیشن دین دے خلاف ہی ہوندی ہے۔ رجسٹرار آفس والے پرانے بیانیے نال جڑے نیں اتے انفارمیشن نوں لکونا ضروری سمجھدے نیں۔