لاہور(مانیٹرنگ رپورٹ) دھرنیاں دے نویں سلسلے پاروں عالمی پدر تے ملک دا مذاق اڈ رہیا ہے۔وائس آف امریکہ ہشیارسرخی لائی پئی فوج دھرنے خلاف آپریشن وچ رلت نہیں کرے گی۔بھارتی اخبار وی سرخیاں لا رہے نیں۔ موقعہ تے اسی آپ دتا ہے اتے ہلے وی کنفیوژن موجود ہے۔کل آج نیوز دے پروگرام ’’روبرو‘‘ وچ شوکت پراچہ نال گل بات کردے پی پی پی دے لیڈر اتے سابقہ داخلہ وزیر رحمن ملک آکھیا کہ عدالتی حکم پاروں کجھ نہیں ہو سکدا۔جے فورس والے اسلحہ ہی ورت نہیں سکدے تے کون دھرنا توڑ سکدا ہے؟داخلہ وزیر نو

ں عدالت کول جانا چاہیدا ہے۔ ایسے پروگرام وچ عارف چوہدری آکھیا پئی عدالت نوں اینج دا حکم دینا ہی نہیں چاہیدا سی۔ اوہ ایس اختیار نوں آپریشن کرن والیاں تے چھڈ دیندے تاں چنگا سی۔پر ایسے پروگرام دے دوجے حصہ وچ پی پی پی دے آیت اللہ درانی اک وکھری کہانی سنا دتی۔انہاں آکھیا ایس سازش مگر یورپی یونین ہے اتے اوس دے آکھن تے ایہہ سازش ہو رہی سی اتے ایس وچ ساریاں پارٹیاں دے ممبر وی رلتی نیں اتے مختلف وزارتاں دے بیوروکریٹ وی۔ انہاں اپنی پارٹی دے ممبراں سنے اک ہزار لوکاں نوں ایس وچ شامل کر دتا۔اوہ کیہہ آکھ رہے سن، ہورے انہاں نوں آپ وی اندازہ نہیں۔فوج دی تعریفاں کردے ہوئے درانی ہوراں سارا ملبہ نواز تے پاون دی کوشش کیتی پر یورپی یونین والی گل کر کے اوہ آپ اپنے ہتھ وڈ چکے سن۔عارف چوہدری وی اٹھ و اٹھ ماردے ہوئے آکھیا پئی حکومت عدالتی حکم دی پرواہ نہ کردے ہوئے ایکشن کر لیندی۔حیران کن گل تے ایہہ ہے پئی جس قسم دی زبان دھرنے والے ورتدے رہے اتے سب نوں گالاں وی کردے رہے اوس بارے میڈیا تے ادارے کیوں نرم نیں؟ہن خبر وچ آکھیا گیا ہے پئی ڈی جی رینجرز ترے دسمبر تیک ایس دھرنے نوں فارغ کرے گی۔ہن چھ دن ہور کم چلے گا۔پروگرام دے اخیر وچ آیت اللہ درانی دسیا پئی قومی اتحاد وچ وی فوج رلن توں انکارکر دتا سی اتے احتجاجیاں تے گولیاں نہیں چلائیاں سن۔فیر ضیا الحق نوں آنا پیا سی۔اپنے ولوں درانی ہوری فوج دی حمائیت کر رہے سن پر ایس بیانیے بعد کجھ ہور آکھن دی لوڑ نہیں کہ نواز مخالفتاں وچ کجھ لوک اٹھ و اٹھ مار رہے نیں۔ویکھیا جائے تے ایس کھیڈ وچ ملک دا ڈاڈھا مذاق بن رہیا ہے