لاہور(مانیٹرنگ رپورٹ) ہن گل ات گرداں خلاف ہو رہی ہے تے سٹیبلشمنٹ نوں سمجھنا چاہیدا ہے۔کوئی نرم تے کوئی گرم گل کر رہیا ہے پر گل اکو ہو رہی ہے

ٹرمپ دے بیان تے برکس اعلامیے پاروں پاکستانی سٹیبلشمنٹ نوں چیتا ہو جانا چاہیدا ہے۔ہلے ٹریلر چلیا ہے کہ جے فلم چلی تے برطانیہ وی ہشیار طریقیاں نال اوہی کرے گا جو اوس 1971وچ کیتا سی۔آندے نیں پئی اوبامہ تے ٹرمپ دوناں ہی امریکہ دے چہرے دے دو رخ نیں اتے جنج دی وائٹ ہاوس تے پینٹاگون نوں لوڑ ہوندی ہے اوس طراں دا چہرہ بٹھا دتا جاندا ہے۔ڈگدی ہوئی برطانوی ر

یاست نوں کوربن دی لوڑ کدوں پیندی ہے ایس بارے بریگسٹ بعدوں امیداں ودھ گیاں نیں۔تساں ذرا کوربن دا ہشیار انٹرویو پڑھو تے لگ پتہ جا سی پئی اوہ اوہی گل کر رہیا ہے جیہڑی ٹرمپ نے آکھی اتے برکس اعلامیے وچ وی آکھی گئی پرتاثر ہمدردی دا دتا۔انہاں ایہہ نہیں آکھیا کہ پاکستان وچ ات گرداں دے ٹھکانے نہیں سگوں ایہہ آکھیا پئی سارے ملکاں نوں دہشت گردی دے خاتمے لئی ہر ممکن کردار ادا کرنا ہوئے گا ۔بر ما دی لیڈر سوچی ہوراں بارے وی انہاں ہشیار پالیسی ہی رکھی اتے پہلے نرم تے بعدوں گرم گل کردے ہوئے1826توں اج تیک برطانیہ دی کھیڈ بارے اک لفظ وی نہیں بولیا کہ جنج انہاں افغان جہاد وچ برطانیہ، امریکہ دے اگڑویں کردار بارے در وٹی رکھیا۔امریکہ توں اْلٹ، چین اوہ ملک ہے جیہڑا ات گردیاں دے نال نال ات گردیاں پیدا کرن مگر لکویں ہشیار عالمی پالیسیاں دی گل وی کردا ہے اتے انہاں وجوہات نوں وی مکانا لوڑی سمجھدا ہے جس پاروں ات گرد پیدا ہوندے نیں۔وڈی پدر تے پچھلے ترے سوسالاں توں دنیادی تواریخ وچ دوجے دہاکے دی اہمیتاں وادھو کہ واٹر لو اتے پہلی وڈی لام بعدوں دنیا نواں بوتھا اساریا سی۔ہن گل ات گرداں خلاف ہو رہی ہے تے سٹیبلشمنٹ نوں سمجھنا چاہیدا ہے۔کوئی نرم تے کوئی گرم گل کر رہیا ہے پر گل اکو ہو رہی ہے۔ایس مسلہ نوں جے پارلیمنٹ تے پاپولر لیڈر شپ حل کرے گی تے وچلا راہ نکل آئے گا۔پر28جولائی بعدوں اساں آپ ایس روہ وچ کنڈے سٹ مارے نیں۔تساں ہن ہشیار برٹش لیڈر دا ہشیار انٹرویو پڑھو۔

برطانیہ دی اپوزیشن لیبر پارٹی دے اگڑویں لیڈرجیریمی کوربن دا کہنا ہے کہ پاکستان دے نال عزت نال پیش آنا چاہیدا ہے تے دوسرے ملکاں نوں ایس تے تنقید توں گریز کرنا چاہیدا ہے۔ امریکی صدر ڈونلڈ ٹرمپ نے اپنے دور صدارت وچ جنوبی ایشیا دے بارے وچ اپنے پہلے خطاب وچ پاکستان نوں رگیدے ہوئے آکھیا سی کہ امریکہ ہن پاکستان وچ دہشت گرداں دے ٹھکانیاں دے معاملے تے ہور چپ نہیں رہ سکدا۔ مسٹر ٹرمپ دے مطابق 20 غیر ملکی دہشت گرد تنظیماں پاکستان تے افغانستان وچ کم کررہیاں نیں جو دنیا وچ کسی وی جگہ توں زیادہ نیں۔ پاکستان دے بارے وچ مزید گل کردے ہوئے صدر ٹرمپ دا کہنا سی کہ امریکہ نال شراکت داری پاکستان لئی بہوں سود مندد ثابت ہوئے گی۔ لیکن جے اوہ مسلسل دہشت گرداں دا ساتھ دے گا تے ایس لئی اوکڑاں پیدا ہوسکدیاں نیں۔ بی بی سی اردو دے نال اک خصوصی انٹرویو وچ ایس سوال دے جواب وچ کہ کیہ تسی پاکستان وچ دہشت گرداں دے ٹھکانیاں دے معاملے بارے ڈونلڈ ٹرمپ دے بیان نوں ٹھیک سمجھدے ہو ؟ لیبر پارٹی دے سربراہ جیریمی کوربن دا کہنا سی کہ پاکستان ایسا ملک ہے جس دے نال عزت نال پیش آنا چاہیدا ہے تے ایس تے باہروں تنقید نہیں ہونی چاہیدی ہے۔فیر کوربن ہوراں نوں پچھیا پئی کیہ پاکستان دہشت گردی دے خاتمے لئی اوہ کردارادا کررہیا ہے جو ایس نوں ادا کرنا چاہندے نیں؟ ایس تے جیریمی کوربن دا کہنا سی کہ سارے ملکاں نوں دہشت گردی دے خاتمے لئی ہر ممکن کردار ادا کرنا ہوئے گا تے ایس گل دا اطلاق سب تے ہوندا ہے۔ مسٹر کوربن دے بقول صدر ٹرمپ دی افغانستان وچ امریکی افواج دی تعداد وچ اضافے دی نویں پالیسی افغانستان دے بارے وچ انہاں دی ناکام پالیسی دا تسلسل جے۔ میں ایس دی حمایت نہیں کردا، افغانستان دے مسئلے دا حل سیاسی گل بات ہی ہے۔ جیریمی کوربن ماضی وچ میانمار دی رہنما آنگ سان سوچی دے کردار تے کڑی تنقید کیتی جارہی ہے تے تُسی کیہ پیغام دینا چاہو گے؟ مسٹر کوربن دا کہنا سی کہ میر ا انہاں لئی پیغام احترام دا ہے، تے ایہہ کہ تسی جداں گھر وچ نظر بند سی تے اسی تہاڈی حمایت وچ مارچ کیتے تے انسانی حقاں لئی تہاڈی جدوجہد دی حمایت کیتی، تے تُسی مہربانی کرو تے روہنگیاں لوکاں دے انسانی حقاں دا وی ایسی طراں خیال رکھو۔ ایہہ یقینی بناؤ کہ میانمار وچ انہاں نوں شہریت دے پورے حقوق حاصل ہون۔ انہاں نوں اپنے ہی ملک وچ اپنے ہی گھراں توں کڈھیا نہ جائے۔ برطانیہ وچ ودھ چکے مسلم مخالف رویے بارے انہاں دا کہنا سی پئی نفرت تے مشتمل جرائم چاہے مسلماناں دے خلاف ہون، یہودیاں دے خلاف ہوئے یا کسی وی مذہب دے خلاف، انہاں دی جیڈی وی مذمت کیتی جائے گھٹ ہے۔ انہاں دا مزید کہنا سی پئی اسی سب اک کمیونٹی(برادری) دی حیثیت توں انہاں حملیاں دے خلاف اکٹھے ہاں جیہڑے برطانیہ وچ ہوندے رہے پر ایس پاروں کسی اک برادری نوں ٹارگٹ نہیں کیتا جا سکدا۔