لاہور (مانیٹرنگ رپورٹٌ) امریکیاں کولوں ترلے کرن دی تھاں نویں رستے لبھنا لوڑی دا ہے۔ٹلرسن دا دورہ وی ہو گیا اتے ٹرمپ پہلاں ہی پاک اٖفغان سانجھا آفس وی بند کر رہیا ہے۔چین پاروں امریکہ بھارت دے نیڑے ہے اتے ایران مخالفتاں وادھو۔پاکستانی سول ملٹری لیڈرشپ دا رل کے امریکی خارجہ وزیر نوں ملنا اک وڈا کم ہے اتے ایس دا لشکارا ہن تھلے تیک نظر آنا لوڑی دا ہے۔جے سب مل کے پالیسیاں بناون گے اتے پارلیمنٹ راہیں دنیا نوں نواں سنیہا دین گے تے سول ملٹری پاڑ تے کوئی خارجی آپدا کھیڈ نہیں کھیل س

کدا۔ایہو اوہ ویلہ پئی پاکستان اج ترکی، ایران، قطر اتے روس ،چین نال ہور تگڑے سانگے بنا سکدا ہے۔خبر ہے کہ پاکستان اپنی دفاعی لوڑاں پاروں ترکی توں جدید لڑاکا ہیلی کاپٹراں دی خریداری تے غور کررہیا ہے۔ کجھ دیہاڑ پہلاں ہی وزیراعظم شاہد خاقان عباسی نے ترکی وچ ٹی 129 لڑاکا ہیلی کاپٹر دی آزمائشی پروازاں دا معائنہ کرن دے بعد صحافیاں نال گل بات وچ آکھیا سی کہ ترکی دی دفاعی پیداواری صنعت ایس شعبے وچ دنیا دی بہترین صعنتاں چوں اک ہے۔ جداں انہاں نوں پچھیا گیا کہ آیا پاکستان ایہہ ہیلی کاپٹر خریدن دا ارادہ رکھدا ہے تے وزیراعظم دا کہنا سی کہ پاکستانی فوج ایس ہیلی کاپٹر دا جائزہ لے رہی ہے تے اسی ایس دی خریداریاں کراں گے۔ ٹی 129 لڑاکا ہیلی کاپٹر میزائل تے گنز توں مسلح ہوندا ہے اتے دن ، رات وچ کاروائیاں کر سکدا ہے۔
امریکی نخریاں وچ وادھے پاروں پاکستان توں کدی کدی روس، ترکی، ایران نال ودھدے سانگیاں دی خبراں آندیاں نیں جیہڑا ایس گل دا لشکارا پئی ہمیش لندن، ریاض تے واشنگٹن ول ویکھن دا کم ہن گھٹ رہیا ہے۔پر پرانے بیانیے والے بڑے تگڑے نیں اتے نویں نویں گھمے بنا کے پاکستان نوں پرانے بیانیے ول پرتن تے مجبور کر رہے نیں۔سوال اہم ایہہ ہے کیہہ پاکستان آپدے ’’اثاثے‘‘ بچاون لئی نویں رستے لبھ رہیا ہے یا ملک چلاون لئی؟ نواں رستہ تے ایس سی او ہے جس دا پاکستان ممبر بن چکیا ہے۔اج دنیا جنگاں دی تھاں کار ویہار نوں خارجہ پالیسیاں نال ودھا رہی ہے کہ پاکستان نوں وی ایسے رستے نوں متھ کے چلنا ہو سی۔