لاہور(مانیٹرنگ رپورٹ)پاک امریکہ سانگیاں بارے بھیڑی خبراں وادھو۔سعودی امریکی اتحاد توں پراں رہن پاروں پاکستان تے پریشر ودھ رہیا ہے۔جو شام دے محاذ تے ہورہیا ہے اوس پاروں خطہ وچ کشیدگیاں نویں نویں شکلاں وچ اگے ودھ سن۔حکومت نوں تنگ کر کے دبا ودھان لئی عالمی تے ملکی پدر تے ہرکارے اگ تے تیل سٹ رہے نیں۔اک غیر ملکی خبر ایجنسی دعویٰ کیتا ہے کہ ٹرمپ انتظامیہ پاکستان توں متعلق پالیسی مزید سخت کرسکدی ہے۔ پالیسی سخت کرن دی وجہ افغان طالبان دی مبینہ محفوظ پناہ گاہاں نیں۔حلانکہ ایہہ وی بہانہ ہے اتے ا

صل کارن کجھ ہور ہے۔غیرملکی خبرایجنسی دی رپورٹ دے مطابق امریکی حکام نے شناخت ظاہرنہ کرن دی شرط تے بیان دتا ہے کہ امریکہ پاکستان نال افغانستان تے حملیاں وچ ملوث دہشت گرداں دی پاکستان وچ محفوظ پناہ گاواں دے خلاف کریک ڈاؤن دا مطالبہ کرے گا۔ رپورٹ دے مطابق پاکستان دا بڑے غیرنیٹواتحادی دا درجہ گھٹ کرن سمیت،ڈرون حملیاں وچ اضافہ،پاکستان نوں امدادوچ تبدیلی یاایس دے روکے جان دے اندازے لائے جا رہے نیں۔ امریکی حکام دا کہنا ہے کہ امریکہ پاکستان نال تعلقات وچ کمی نہیں بلکہ وڈا تعاون چاہنداہے۔ ایہہ وڈا تعاون افغانستان وچ ہے یا مڈل ایسٹ وچ، ایس بارے خدشے وادھو۔افغانستان وچ 16سالہ جنگ توں متعلق اسٹرٹیجی دے جائزے مکمل ہون دے بعد اہم اقدامات چُکے جان گے۔پینٹاگون دے بلارے دا کہنا ہے کہ امریکہ تے پاکستان وچ ساجھے داری وی جاری ہے،جدوں کہ امریکی حکام دا کہنا ہے کہ پاکستان توں متعلق امریکی پالیسی کیہ ہے ایس بارے ہلے مکمل طورپرکجھ نہیں کہہ سکدے۔